Bakı Dövlət Universiteti Jurnalistika fakültəsi

Jurnalistika fakültəsində “Zəfər yolu Azərbaycan mətbuatının işığında” adlı kitabın təqdimatı keçirilib.

Əvvəlcə Vətən uğrunda canlarını fəda edən şəhidlərimizin əziz xatirəsi 1 dəqiqəlik sükutla yad edilib.

Tədbiri açan dekan müavini Samir Mirzəyev kitab və müəlliflə bağlı iştirakçıları məlumatlandırıb.

Müəllif, Yeni media və kommunikasiya nəzəriyyəsi kafedrasının saathesabı müəllimi Kənan Novruzov çıxışı zamanı bildirib ki, elmi üslubda yazılan kitabda İkinci Qarabağ müharibəsi zamanı Azərbaycan mətbuatının fəaliyyəti təhlil edilib. Qeyd edib ki, onun savaş dövründəki fəaliyyəti kitabın ərsəyə gəlməsində mühüm rol oynayıb.

Daha sonra nəşrin elmi redaktoru, professor Cahangir Məmmədli sözügedən kitabın əhəmiyyətinə toxunub. O bildirib ki, bu cür əsərlər tarixin salnaməsidir.

"Şərq" qəzetinin baş redaktoru  Akif Aşırlı, "Report" İnformasiya  Agentliyinin baş redaktoru Murad Əliyev, Jurnalistika fakültəsinin professoru Sabir Məmmədli, Yeni media və kommunikasiya nəzəriyyəsi kafedrasının müdiri Xatirə Hüseynova  çıxışlarında gələcəkdə də bu tipli kitabların  ərsəyə gəlməsinin əhəmiyyətini vurğulayıblar və müəllifə uğurlar arzu ediblər.

Sonda müəllif tələbələrin çoxsaylı suallarını cavablandırıb.