Professor Cahangir Məmmədli ilə görüş
Tədbiri giriş sözü ilə açan fakültənin Sosial məsələlər və tələbələrlə iş üzrə dekan müavini Samir Mirzəyev tələbə-jurnalistlərlə qocaman müəllimlər arasında belə görüşlərin keçirilməsinin böyük əhəmiyyətə malik olduğunu qeyd edib. Tədbirin Cahangir Məmmədlinin doğum gününə təsadüf etməsindən dolayı müəllimi təbrik edən natiq ona can sağlığı və işlərində müvəffəqiyyət arzu edib. Söz alan fakültə dekanı, filologiya üzrə elmlər doktoru Vüqar Əliyev də öz növbəsində Cahangir müəllimi təbrik edərək onun elmi-pedaqoji fəaliyyətindən, jurnalistikanın inkişafındakı xidmətlərindən söhbət açıb.
Sonra söz C.Məmmədliyə verilib. Cahangir müəllim jurnalistikaya olan sevgisindən, fakültəyə gəlişindən, tələbəlik illərindən, fakültədəki müsbət atmosferdən danışıb. O, fakültədə istər tələbə, istərsə də müəllim işləyərkən böyük ustad Şirməmməd Hüseynovun ona daim hamilik etməsindən şükranlıqla danışıb. C.Məmmədli junalistikanın çətin və məsuliyyətli sənət olduğunu qeyd edərək, əsl jurnalist adını almaq üçün çox böyük səylə çalışmaq, daim mütaliə etmək və bu peşəni sevərək işləməyin əsas şərtlərdən biri olduğunu tələbələrin diqqətinə çatdırıb. Cahangir müəllim jurnalistikanın sirləri ilə bağlı tələbə-jurnalistlərə dəyərli məsləhətlərini verib, onlara özünü bu ixtisas üzrə yetişdirməyin əsas şərtlərini izah edib.
Daha sonra C.Məmmədli tələbələrin çoxsaylı və maraqlı suallarını cavablandırıb.