Jurnalistika fakültəsinin tələbələri “İlin Könüllüsü” mükafatına layiq görülüblər
“Azərbaycan Könüllülük Həftəsi 2025” çərçivəsində təşkil olunan Azərbaycan Könüllülərinin VIII Həmrəylik Forumu ölkənin müxtəlif ali təhsil müəssisələrini, ictimai birlikləri və könüllü hərəkatlarını təmsil edən 3500-ə yaxın gənci bir araya gətirib. Gənclərin həmrəylik ruhunu gücləndirməyi, onların cəmiyyətə faydalı fəaliyyətlərini təşviq etməyi qarşıya məqsəd qoyan forumda Bakı Dövlət Universitetinin (BDU) Jurnalistika fakültəsinin könüllüləri də fəal iştirak ediblər.
Bu il forum “Konstitusiya və Suverenlik İli”nə həsr olunduğundan, tədbir boyu ölkədə gənclərin dövlətçilik dəyərlərinə bağlılığını, ictimai təşəbbüslərdə rolunu və könüllülük mədəniyyətinin inkişafını vurğulayan panel müzakirələr və təqdimatlar keçirilib. Könüllülərin bir il ərzində həyata keçirdikləri layihələr dəyərləndirilib, fərqlənən gənclər xüsusi mükafatlarla təltif olunub.
Jurnalistika fakültəsinin tələbələri arasında iki gənc xüsusilə fərqlənib. Nəzrin Xankişiyeva uzun müddət davamlı və ardıcıl şəkildə göstərdiyi sosial fəaliyyətinə görə “Uzunmüddətli könüllülük” nominasiyası üzrə “İlin Könüllüsü” mükafatına layiq görülüb. Ayxan Məlikzadə isə böyük auditoriyaları bir araya gətirən tədbirlərin təşkili və idarə olunmasında göstərdiyi peşəkarlığa görə “Genişmiqyaslı tədbirlərdə könüllülük” nominasiyası üzrə ilin qalibi seçilib.
Bu nailiyyətlər tələbələrimizin həm fakültəmizi, həm də könüllülük hərəkatını layiqincə təmsil etdiklərini bir daha göstərir. Qaliblərimizi səmimi qəlbdən təbrik edir, onların gələcək fəaliyyətlərində daha böyük uğurlar qazanmalarını arzulayırıq.
