Jurnalistika Fakültəsində İnformator.az-ın əməkdaşları sertifikatla təltif olunub
Bakı Dövlət Universitetinin (BDU) Jurnalistika fakültəsində İnformator.az-ın əməkdaşlarının saytda göstərdikləri fəaliyyətlərinə görə sertifikatla təltif etmə mərasimi keçirilib.
Tədbiri açan dekan müavini Samir Xalidoğlu İnformator.az-ın fəaliyyətinin və BDU jurnalistika tələbələrinin inkişafına verdiyi töhfələrin əhəmiyyətini vurğulayaraq, saytın təsisçisi və baş redaktoru Aynur Nəsirovaya təşəkkürünü bildirib.
Aynur Nəsirova saytın yaradılmasının əsas məqsədinin Bakı Dövlət Universitetinin Jurnalistika fakültəsinin tələbələrinə geniş təcrübə imkanları yaratmaq, onların praktiki iş bacarıqlarını inkişaf etdirmək və eyni zamanda, tələbələrin imzalarını tanıtmalarına yardım etmək olduğunu qeyd edib. O, saytın fəaliyyətinin, tələbələrin jurnalistika sahəsindəki peşəkar inkişafına dəstək olduğunu və bu cür təşəbbüslərin gələcəkdə daha da genişlənəcəyini söyləyib.
Tədbirdə iştirak edən fakültəsinin dekan müavinləri Sevinc Əliyeva, Esmira Rövşənova, kafedra müdirləri Cahangir Məmmədli, Qulu Məhərrəmli, Xatirə Hüseynova və dosent Zaur Babayev çıxış ediblər.
Onlar da öz növbələrində tələbələri təbrik edərək fakültədə fəaliyyət göstərən 24media.az və Crossmedia.az-ın da tələbələrin inkişafına əhəmiyyətli töhfələr verdiyini, onları peşəkar fəaliyyətə hazırlamaqda önəmli rol oynadığını vurğulayıblar.
Tədbir sertifikatların təqdim edilməsi ilə yekunlaşıb.