Bakı Dövlət Universiteti Jurnalistika fakültəsi

Beynəlxalq jurnalistika və informasiya siyasəti kafedrasının dosenti Vəfa İsgəndərovanın  “Data jurnalistikası və onun Azərbaycan mediasında tətbiqi” mövzusunda  elmi seminarı keçirilib.

Giriş sözü ilə çıxış edən elmi işlər üzrə dekan müavini Sevinc Əliyeva doktorantın özü və elmi işi ilə bağlı seminar iştirakçılarını məlumatlandırıb.

V.İsgəndərova  “Data jurnalistikası və onun Azərbaycan mediasında tətbiqi”  mövzusu ilə çıxış edib. Bildirib ki, “Müxtəlif səviyyələrdə ənənəvi və yeni mediada tətbiq edilən data təhlillər müasir trendlərdən sayılır. Əsasən dörd mərhələdən ibarət olan data jurnalistikası məhsulu araşdırmaların, statistik və rəqəmlərə əsaslanan məlumatların tələbi ilə ərsəyə gəlir və bu məhsulun hazırlanması üçün bir komanda işi tələb olunur. Buna baxmayaraq, dünya ölkələrinin əsasən yeni media sistemində geniş yayılan data analiz metodu auditoriyanın marağına səbəb olur, çünki insanlar onun vizual effektlərini daha asan şəkildə qəbul edirlər”.

Məruzəçi sözügedən metodun Azərbaycan media subyektlərində istifadəsinin bir qədər zəif inkişaf etdiyini və bunun bir sıra səbəbləri olduğunu da diqqətə çatdırıb.

Vəfa İsgəndərova elmi seminarda beynəlxalq mediada data analiz metodlarının inkişaf  səviyyəsindən, data  jurnalistlərinin qarşılaşdığı çətinliklər və onların aradan qaldırılması yollarından, eyni zamanda gələcək perspektivlərindən danışıb.

Seminarda  Beynəlxalq jurnalistika və informasiya siyasəti kafedrasının müdiri dos.Aynur Nəsirova, Yeni media və kommunikasiya nəzəriyyəsi kafedrasının müdiri dos. Xatirə Hüseynova, Elmi təşkilati şöbənin əməkdaşı Məleykə Rzayeva, fakültənin müəllimləri dos.Sevil Həsənova, dos.Qərənfil Quliyeva, dos.Zaur Babayev, dos.Pərvanə İbrahimova, dos.Aytəkin Zeynalova, Samir Mirzəyev, Xalidə Cavadova iştirak ediblər.

Çıxış edənlər məruzəçinin mövzu ilə bağlı hazırlığını yüksək qiymətləndirərək, elmi  işlərində uğurlar arzulayıblar.

Elmi seminar mövzu ilə bağlı maraq doğuran sualların cavablandırılması ilə yekunlaşıb.

Qeyd edək ki, elmlər doktoru proqramı üzrə doktorant olan Vəfa İsgəndərovanın elmi məsləhətçisi  filologiya elmlər doktoru Vüqar Əliyevdir.