Dr. Bahadır Avşar tələbələrlə görüşüb
Jurnalistika fakültəsində TRT-nin sosial media və xəbər mütəxəssisi, Türkiyənin tanınmış media araşdırmaçısı Bahadır Avşarla görüş keçirilib.
Əvvəlcə giriş sözü ilə çıxış edən fakültə dekanı Vüqar Əliyev görüşün məqsədi ilə bağlı məlumat verərək qonağı təqdim edib.
B.Avşar jurnalistikanın tarixi, nəzəriyyəsi və müasir vəziyyəti haqqında bəhs edib, praktik jurnalist biliklərini paylaşıb.
TRT kanallarının xüsusiyyətləri, xəbərçiliyin əsasları, yeni media, sosial media, internet televiziya kanallarının iş prinsipləri haqqında da müəllim və tələbələri məlumatlandırıb. O, eyni zamanda “TRT Gələcəyin iletişimciləri” yarışmasının keçirildiyini vurğulayıb və tələbələrin adı çəkilən yarışmaya qatılmalarını tövsiyə edib.
Görüş Jurnalistika fakültəsi ilə AzTV-nin Teleradio Akademiyası arasında imzalanmış əməkdaşlıq müqaviləsi çərçivəsində gerçəkləşdirilib.
Qeyd edək ki, Rəqəmsal diplomatiya sahəsində doktorluq dərəcəsi almış Bahadır Avşar uzun illər Türkiyədə bir sıra dövlət qurumlarında media və ictimaiyyətlə əlaqələr üzrə çalışıb. 2015-ci ildən etibarən TRT-nin Baş katibliyində araşdırmaçı kimi fəaliyyət göstərir və jurnalistikanın müxtəlif istiqamətləri üzrə təlimlər keçirir.
